އައްޑޫ ސިޓީ ހިތަދޫގައި އިދިކޮޅު ފަރާތްތަކުން މިއަދު ހަވީރު ބާއްވާ "ނިމުމެއް ނެތް އެއްވުން" ފެށުމާއި އެކު އެމްޑީޕީ އޮފީސް ހުންނަ ސަރަހައްދުގައި ފުލުހުން ނިކުމެ ބެރިކޭޑް ޖަހައި ހުރަސް އެޅުމާއި އެކު ވެސް އެ މުޒާހަރާ ކުރިއަށް އެބަގެންދެއެވެ.
ބެރިކޭޑް ޖަހައި ފުލުހުން ލިންކް ރޯޑް ބަންދުކުރި ނަމަވެސް އެ ސަރަހައްދުގެ އެހެން ގޯޅިތަކުން މުޒާހަރާގެ ބައިވެރިން މިހާރު ވަނީ ހިތަދޫ ބޮޑުމަގާއި ދިމާލަށް ގޮސް މިސްރާބު ޖަހާފައެވެ. އެހިސާބުން ފުލުހުން ނިކުމެ މުޒާހަރާގެ ބައެއް ބައިވެރިން ހައްޔަރުކުރުމުން މިހާރު މުޒާހަރާގެ ބައިވެރިން ވަނީ އަނެއްކާ ވެސް ހިތަދޫ އެމްޑީޕީ ހަރުގެ ކައިރިއަށް އެއްވާން ފަށާފައެވެ.