ބްރިގޭޑިއާ ޖެނެރަލް ޒަކަރިއްޔާ މަންސޫރު ސިފައިންގެ ތެރޭގައި ބަންދުކޮށްފައިވާ ވާހަކަ މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)އިން ދޮގުކޮށްފިއެވެ.
ޒަކަރިއްޔާ މަންސޫރު ސިފައިންގެ ތެރޭގައި ބަންދުކޮށްފައިވާކަމަށް މައުލޫމާތު ލިބިފައިވާކަމަށް ވިދާޅުވެ ކުރީގެ ރައީސް މުހައްމަދު ނަޝީދު ވަނީ މިއަދު ޓްވީޓެއް ކުރައްވާފައެވެ.
Reports that MNDF 3rd in command, General Mansoor, detained in army HQ in Male'. One of the longest serving MNDF officers. It's time individual soldiers, and police officers, ask themselves if they want to keep following Prez. Yameen's unlawful orders
— Mohamed Nasheed (@MohamedNasheed) March 5, 2018
ރައީސް ނަޝީދު ކުރެއްވި ޓްވީޓެއްގައި ވިދާޅުވީ މިއީ ސިފައިންނާއި ފުލުހުން، ރައީސް ޔާމީނުގެ ޣައިރު ޤާނޫނީ އަމުރުތަކަށް ކިޔަމަންވަމުންދާނީތޯ އަމިއްލަ ނަފްސާ ސުވާލުކުރަން ޖެހޭ ވަގުތުކަމަށެވެ. އަދި ޖެނެރަލް މަންސޫރަކީ ސިފައިންގޭގައި އެންމެ ގިނަ ދުވަހު މަސައްކަތްކުރެއްވި އެއް އޮފިސަރުކަން ރައީސް ނަޝީދު ފާހަގަކުރެއްވިއެވެ.
ކައުންޓަ ޓެރަރިޒަމް ސެންޓަރުގައި އިސްކޮށް އުޅުއްވާ ޒަކަރިއްޔާ މަންސޫރު، ހައްޔަރު ކުރި ވާހަކަ ދޮގު ކުރައްވައި އެމްއެންޑީއެފްއިން ބުނީ އެ މުއައްސަސާއާ ގުޅިގެން ފަތުރަމުން ދަނީ ހަގީގަތާ ޚިލާފު ވާހަކައެއް ކަމަށެވެ. ނަމަވެސް އިތުރު ތަފްސީލެއް އެމްއެންޑީއެފްއިން ނުދެއެވެ.
ސުޕުރީމް ކޯޓުން ފެބްރުއަރީ 1 ވަނަ ދުވަހު ނެރުނު އަމުުރާއި ގުޅިގެން ބައެއް ސިފައިން ވަނީ ހައްޔަރުކޮށްފައެވެ. ނަމަވެސް އޭގެ ތަފްސީލެއްވެސް އެމްއެންޑީއެފްއިން ހާމަ ނުކުރެއެވެ.