މި މަހުގެ 10 ވަނަ ދުވަހު ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓްގައި އެކްސިޑެންޓްވި ކާރަކީ ޓްރާސްޕޯޓް އޮތޯރިޓީގައި ރަޖިސްޓްރީ ކޮށްފައި ނުވާ ކާރެއްކަމަށް މައުލޫމާތު ލިބިއްޖެއެވެ.
މައުލޫމާތު ލިބިފައިވާ ގޮތުގައި އެކްސިޑެންޓްވި "ޓޮޔޯޓާ އެރިސްޓޯ" ކާރަކީ އެއްގަމު ދުއްވާ އުޅަނދު ރަޖިސްޓްރީ ކުރުމުގެ ގަވާއިދާއި ހިލާފަށް ރަޖިސްޓްރީ ކުރުމެއް ނެތި އަދި އިންޝޫރެންސް ކޮށްފައި ނުވާ ކާރެކެވެ.
ހިތަދޫ ކުނި ކޮށި ކައިރީ ހިނގި މިއެކްސިޑެންޓްގައި ސައިކަލް ދުއްވަން އިން ހިތަދޫ ނޫމުގުމާގެ، މުހައްމަދު ރަޝްމު ރިޔާޒުވަނީ ވަގުތުން މަރުވެފައެވެ.
މިހާދިސާގައި ނިޔާވި ރަޝްމުގެ ހަށިގަނޑަށް ލިބިފައިވާ އަނިޔާތަކަކީ މިހާތަނަށް ލިންކު ރޯޑުގައި ހިނގި އެކްސިޑެންޓެއްގައި މީހަކަށް އެންމެ ބޮޑަށް އަނިޔާވި އެކްސިޑެންޓެވެ.
މިހާދިސާގައި ރަޝްމު ދުއްވި ސައިކަލާއި ކާރަށް ވެސް ވަނީ ބޮޑެތި ގެއްލުންތަކެއް ލިބިފައެވެ. ކާރު ދުއްވަން އިން ފަރާތް ފުލުހުންގެ ބެލުމުގެ ދަށައް ގެންގޮސްފައިވާ އިރު ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފައެވެ.
ފުލުހުން ބުނީ މިހާދިސާ ތަހްގީގު ކުރަމުންދާތީ ތަފްސީލް ހާމަ ކުރެވެން ނެތް ކަމަށެވެ.