ފުލުހުންގެ ޔުނީފޯމް ލައްވައިގެން ގޭންގްތައް މާލޭގެ މަގުތަކަށް ރޭ ނެރުއްވި ކަމަށް ކުރީގެ ރައީސް މުހައްމަދު ނަޝީދު ކުރެއްވި ތުހުމަތަށް ކުރީގެ ކޮމިޝަނާ އޮފް ޕޮލިސް ހުސައިން ވަހީދު ރައްދު ދެއްވައިފި އެވެ.
ރޭ ރައީސް ނަޝީދު ކުރެއްވި ޓްވީޓެއްގައި ވިދާޅުވެފައި ވަނީ މޯލްޑިވްސް ޕޮލިސް ސާވިސް (އެމްޕީއެސް) ގެ ޔުނީފޯމްގައި ގޭންގްތަކުން 45 ކުދިން މަގުމައްޗަށް ނެރެފައިވާ ކަމަށާއި، އެކަމުގައި އިސްކޮށް ހުންނަވަނީ ކުރީގެ ސީޕީ ހުސައިން ވަހީދު ކަމަށެވެ.
MPS uniform gai gang thakun 45 kudhin nerijje. Mi kamugai iskoh hunanee kureege CP Hussain Waheed. MNDF adhi MPS rayyathun ge dhifaau ga nikumevadaiganavaa
— Mohamed Nasheed (@MohamedNasheed) March 16, 2018
މީގެ އިތުރުން ރައީސް ނަޝީދު ވަނީ ދިވެހި ރައްޔިތުންގެ ދިފާޢުގައި ނިކުމެވަޑައިގަތުމަށް ފުލުހުންނާއި ސިފައިންނަށް ގޮވާލައްވާފައެވެ.
ރައީސް ނަޝީދުގެ މި ޓްވީޓަށް ރައްދު ދެއްވައި ކުރީގެ ސީޕީ ހުސައިން ވަހީދު ވަނީ ޓްވީޓެއް ކުރައްވާފަ އެވެ.
Sir. Moyafulhu vee tho? Alhugandu nujeheyne bayaku nereykah. Dhivehi Sifain naai Fuluhunge kibaiga maguthah amaan kurumuge gaabilu kan hunnaane. E beyfulhun e kankan kuravvaane.
— Hussain Waheed (@HussainWaheed3) March 16, 2018
އެގޮތުން ހުސައިން ވަހީދު ކުރެއްވި ޓްވީޓްގައި ރައީސް ނަޝީދު މޮޔަފުޅުވީތޯ ސުވާލުކުރައްވައި ވިދާޅުވީ ބަޔަކު ނެރޭކަށް އޭނާ ނުޖެހޭނެ ކަމަށެވެ.
އަދި މަގުތަށް އަމާން ކުރުމުގެ ޤާބިލުކަން ދިވެހި ސިފައިންނާއި ފުލުހުންގެ ކިބައިގައި ހުންނާނެ ކަމަށާއި، އެ ބޭފުޅުން އެކަންކަން ކުރައްވާނެ ކަމަށްވެސް ހުސައިން ވަހީދުގެ ޓްވީޓްގައި ވިދާޅުވެފައި ވެއެވެ.
ރައީސް ނަޝީދުގެ މައްޗަށް ޓެރަރިޒަމްގެ ކުށް ސާބިތުކޮށް، 13 އަހަރަށް ޖަލަށް ލީ ކޮމިޝަނަރަކަށް ހުސެން ވަހީދު ހުންނަވަނިކޮށެވެ. އެކަމަކު 2015 ގައި ރައީސްގެ ރަސްމީ ލޯންޗުކޮޅު "ފިނިފެންމާ"ގައި އެއްޗެއް ގޮއްވާލި ހާދިސާއަށް ފަހު ފުލުހުންގެ އިދާރާއަށް ގެނައި ބަދަލުތަކުގެ ތެރޭގައި ހުސެން ވަހީދު ވަނީ ހައުސިން މިނިސްޓްރީގެ ސްޓޭޓް މިނިސްޓަރަކަށް ހަމަޖައްސައިފަ އެވެ.
ރޭގެ މުޒާހަރާގައި އިދިކޮޅު ކޯލިޝަންގެ އެއް ލީޑަރު، އަދި އެމްޑީޕީ ޕާލަމެންޓްރީ ގުރޫޕުގެ ލީޑަރު އިބްރާހިމް މުހައްމަދު ސޯލިހާއި ރައްޔިތުންގެ މަޖިލިހުގެ އެހެން ދެ މެމްބަރުން ކަމަށްވާ އަލީ އާޒިމާއި ހުސެން މުހައްމަދާ އެކު 141 މީހަކު ހައްޔަރުކޮށްފައިވެ އެވެ.
ރޭގެ މުޒާހަރާގައި އެހެން ރޭރެއަށް ވުރެ ގިނަ އަދަދަށް މީހުން ބައިވެރިވިކަން ފާހަގަކޮށްލެވެ އެވެ.