ހއ. މާރަންދޫ ކައުންސިލްގެ ހުސްވެފައިވާ ގޮނޑިއަށް މެންބަރަކު އިންތިޚާބުކުރުމަށް ބާއްވާ ބައި-އިލެކްޝަންގައި ވާދަކުރައްވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކެންޑިޑޭޓް ޝިހާމް މުހައްމަދުގެ ކެމްޕޭނަށް އެމްޑީޕީގެ ރައީސް އަބްދުﷲ ޝާހިދު އެރަށަށް ވަޑައިގެންފިއެވެ.
އެމްޑީޕީގެ ރައީސް ޝާހިދު ވަނީ މާރަންދޫގައި ބޭއްވި ކެމްޕޭން ހަރަކާތްތަކުގައި ބައިވެރިވެވަޑައިގެންފައެވެ. އެގޮތުން މާރަންދޫގައި ދޮރުން ދޮރަށް ހިންގަވާ، ރައްޔިތުންނާ ބައްދަލުކުރައްވާ މަޝްވަރާ ކުރެއްވިއެވެ.
އިއްޔެ ކުރިއަށް ގެންދިޔަ މި ހަރަކާތްތަކުގައި ޝާހިދު ވަނީ މާރަންދޫގެ އެމްޑީޕީ ކެމްޕޭން ޓީމާއިވެސް ބައްދަލުކުރައްވާފައެވެ.
މާރަންދޫގައި ކުރިއަށްގެންދިޔަ އެމްޑީޕީ ކެންޑިޑޭޓް ޝިހާމްގެ ކެމްޕޭން ހަރަކާތްތަކުގައި އެމްޑީޕީގެ ރައީސް ޝާހިދުގެ އަރިހުގައި އެމްޑީޕީގެ ޑެޕިއުޓީ ޗެއާޕާސަން އަހުމަދު އަބްދުﷲ އާއި، އިހަވަންދޫ ދާއިރާގެ ދާއިރާ ރައީސް މުހައްމަދު ޝިފާއުއާއި، ކުޑަހުވަދޫ ދާއިރާގެ ދާއިރާ ރައީސް ޝާތިރު އަބްދުއްރަހުމާނު އަދި އަންހެނުންގެ ރޫޙުގެ ނައިބު ރައީސާ އީމާ ޝަފީގް ބައިވެރިވެވަޑައިގަތެވެ.
މާރަންދޫ ކައުންސިލްގެ ބައިއިލެކްޝަން އޮންނާނީ ސެޕްޓެމްބަރު 14 ވާ ހޮނިހިރު ދުވަހުއެވެ.
މި ބައިއިލެކްޝަނުގައި ޕީއެންސީގެ ޓިކެޓުގައި ވާދަކުރާ ކެންޑިޑޭޓަށް ތާއީދު ހޯދުމަށް ހެލްތް މިނިސްޓަރ ޑރ. އަބްދުالله ޚަލީލް ހިމެނޭހެން ޕީއެންސީގެ ޓީމެއްވެސް އަންނަނީ މާރަންދޫގައި ހަރަކާތްތެރިވަމުންނެވެ.