ޝަރީއަތުން ވަކި ގޮތެއް ކަނޑައަޅަންދެން ކުރީގެ މެމްބަރު އަހުމަދު ނިހާން ހުސައިން މަނިކްގެ ޕާސްޕޯޓް ހިފެހެއްޓުމަށް ކްރިމިނަލް ކޯޓުން ނިންމައިފިއެވެ.
ކްރިމިނަލް ކޯޓުން މިގޮތަށް ނިންމާފައިވަނީ ނިހާންގެ މައްސަލައިގައި މިއަދު ބޭއްވި އަޑުއެހުމުގައެވެ.
އެމްއެމްޕީއާރްސީ ހިޔާނާތުގެ މައްސަލައިގައި ނިހާންގެ މައްޗަށް މަނީލޯންޑްރިން އަދި ރިޝްވަތުގެ ދައުވާތަކެއް އުފުލާފައިވާއިރު، މިއަދު ވަނީ އެމައްސަލައިގައި ފުރަތަމަ އަޑުއެހުން ބާއްވާފައެވެ.
މިއަދުގެ އިބްތިދާއީ އަޑުއެހުމުގައި މައްސަލައިގެ ލިޔެކިޔުންތައް ލިބިފައިވޭތޯ ގާޒީ ސުވާލު ކުރުމުން ނިހާން ވިދާޅުވީ މީގެ ދުވަސްކޮޅެއް ކުރިން ލިޔެކިޔުންތައް ލިބިފައިވާކަމަށެވެ. މައްސަލަ ކުރިއަށްގެންދިއުމުގައި ވަކީލަކު ބޭނުންތޯ ގާޒީ ސުވާލު ކުރުމުން ނިހާން ވިދާޅުވީ، ވަކީލަކު ބޭނުންވާކަމަށެވެ. އެހެންކަމުން މައްސަލަ ބައްލަވާ ގާޒީ ވަނީ ނިހާނަށް ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދެއްވާފައެވެ. އަދި އެމުއްދަތުގައި މަޤުބޫލު ސަބަބެއް ކުރިމަތިވެ ވަކީލަކު އައްޔަނު ނުކުރެވިއްޖެނަމަ ވަކީލަކު އައްޔަނު ކުރުމަށް އިތުރު ފުރުސަތު ދެއްވާނެ ކަމަށް މައްސަލަ ބައްލަވާ ގާޒީ ވިދާޅުވި އެވެ.
މިއަދުގެ އަޑުއެހުމުގައި ދައުލަތުން ބުނެފައިވަނީ، ނިހާންގެ ޕާސްޕޯޓް ހިފެހެއްޓުމަށް ކޯޓުން ނެރެފައިވާ އަމުރުގެ މުއްދަތު މިއަދަށް ހަމަވާ ކަމަށެވެ. އެހެން ކަމުން އެ މުއްދަތު އިތުރު ކޮށްދިނުމަށް ދައުލަތުން ވަނީ ޝަރީއަތުގައި އެދިފައެވެ. މިކަމާއި ގުޅިގެން ޝަރީއަތުގައި ވާހަކަ ދައްކަވަމުން ނިހާން ވިދާޅުވީ، އޭނާ އެއްވެސް ތަނަކަށް ފުރުމުގެ ވިސްނުމެއްވެސް ނެތް ކަމަށާއި، ބޭނުން މުއްދަތަކަށް ޕާސްޕޯޓް ހިފެހެއްޓިޔަސް މައްސަލައެއް ނެތް ކަމަށެވެ.
އެހެންކަމުން މައްސަލަ ބައްލަވާ ގާޒީ ނިންމެވީ، ޝަރިއަތުން ވަކިގޮތެއް ކަނޑައަޅަންދެން ނިހާންގެ ޕާސްޕޯޓް ހިފެހެއްޓުމަށެވެ. އަދި ގާޒީ ވިދާޅުވީ ދެން މައްސަލައިގެ އަޑުއެހުމެއް އޮންނާނީ ދައުވާ ރައްދުވާ ނިހާން އަށް ވަކީލަކު ހަމަޖެހުމުން ކަމަށެވެ.
ނިހާންގެ މައްޗަށް އުފުލާ ދައުވާގެ ތަފްސީލު:
އެމްއެމްޕީއާރުސީ މެދުވެރިކޮށް ހިންގި ހިޔާނާތާއި ކޮރަޕްޝަނާއި މަނީ ލޯންޑަރިންގެ ކުށްތަކާ ގުޅިފައިވާ ފައިސާ ނިހާނަށް ލިބުނު މައްސަލަ ފުލުހުންނާއި އޭސީސީ އަދި އެސެޓް ރިކަވަރީ ކޮމިޝަން ގުޅިގެން ތަހުގީގުކުރުމަށްފަހު ނިހާންގެ މައްޗަށް ވަނީ ހަ ދައުވާއެއް ކޮށްފައެވެ.
ޕީޖީ އޮފީހުން ބުނީ، ނިހާން ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރުކަމުގައި އަދި މާލިއްޔަތު ކޮމެޓީގެ މުގައްރިރުގެ މަގާމުގައި ހުރި އިރު، އޭނާގެ މަގާމުގެ ހައިސިއްޔަތުން އަދާކުރަން ޖެހޭ މަސްއޫލިއްޔަތުތައް ވަކިގޮތަކަށް ކުރުމަށް ނުވަތަ ނުކޮށް ދޫކޮށްލުމުގެ މުގާބިލުގައި ކުރީގެ ނައިބު ރައީސް އަހުމަދު އަދީބުގެ ގާތު ރިޝްވަތަށް އެދި، އަދި އަދީބު ދީފައިވާ ރިޝްވަތު ހިފައި ކުށް ކޮށްގެން ހޯދާފައިވަ ފައިސާ އަތުގައި ބަހައްޓައި އެ ފައިސާ ބޭނުންކޮށްފައިވާކަން ތަހުގީގަށް ހޯދިފައިވާ ކަމަށެވެ.
ނަމަވެސް ނިހާނަށް ލިބިފައިވާ އެފަދަ އެއްވެސް ފައިސާއެއް ލިބުނުކަން އޭނާ 2014 އިން ފެށިގެން 2019 އާދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައިނުވާ ކަމަށް ޕީޖީ އޮފީހުން ބުންޏެވެ.
މި މައްސަލަތަކުގައި ނިހާންގެ މައްޗަށް ދައުލަތުން އުފުލަނީ ރިޝްވަތު ހިފުމުގެ ކުށުގެ ތިން ދައުވާއަކާއި މަނީ ލޯންޑަރިންގެ ދައުވާއަކާއި ރިޝްވަތު ލިބިދިނުމަށް އެދުމުގެ ކުށުގެ ދެ ދައުވާއެކެވެ. އަދި މި މައްސަލައިގައި އުފުލާފައިވާ ދައުވާތަކާ ގުޅިގެން ނިހާން ކުށްކޮށްގެން ހޯދާފައިވާ ފައިސާ އަދި އެއާ އެއްކޮށްފައިވާ މުދާ އަދި ފައިސާ ދައުލަތަށް ނަގައިދިނުމަށް ވެސް ކޯޓުގައި ވަނީ އެދިފަ އެވެ.
ޕީޖީ އޮފީހުން ބުނީ ނިހާން ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން އަދާކުރަން ޖެހޭ ވާޖިބަށް ނުފޫޒު ފޯރުވުމުގެ ގޮތުން އޭރު ޓޫރިޒަމް މިނިސްޓަރަކަށް ހުންނެވި އަދީބު މެދުވެރިވެގެން އެސްއޯއެފް ޕްރައިވެޓް ލިމިޓެޑުން 150،000 އެމެރިކާ ޑޮލަރުގެ ޗެކެއް ލިބިގަނެ، އެ ފައިސާ އާއި އެހެން ފައިސާ އެއްކުރުމަށްފަހު ޕްލެޓިނަމް ރެޒިޑަންސް އިން ފްލެޓެއް ގަނެފައިވާ ކަމަށެވެ.
އޭގެ އިތުރުން 2014 ވަނަ އަހަރު ޕްރޮސެކިއުޓާ ޖެނެރަލްގެ މަގާމަށް މީހަކު އައްޔަން ކުރުމަށާއި ހަމަ އެ އަހަރު ރައްޔިތުންގެ މަޖިލީހުގެ މެންބަރުންގެ ތެރެއިން ޖުޑީޝަލް ސާވިސް ކޮމިޝަނަށް އައްޔަންކުރާ މެންބަރު ހޮވުމަށްޓަކައި ރައްޔިތުންގެ މަޖިލީހުން ނެގި ވޯޓާ ގުޅިގެން، ރިޝްވަތުގެ ގޮތުގައި ރޮލެކްސް (ސަބްމެރީނާ) ބްރޭންޑުގެ ގަޑިއެއް ދިނުމަށް އަދީބު ގާތުގައި އެދުމުން، މ. ވިލާދަށުގެ/ މުހައްމަދު މަނިކު (އެއްލައިދޫ މަނިކު) މެދުވެރިކޮށް އަދީބު ދިން ގަޑި ބަލައިގަނެފައިވާ ކަމަށް ވެސް ޕީޖީ އޮފީހުން ބުންޏެވެ.
މީގެއިތުރުން ނިހާން ރައްޔިތުންގެ މަޖިލީހުގެ މެންބަރަކަށް ހުރިއިރު، އޭނާގެ މެންބަރުކަމުގެ ހައިސިއްޔަތުން އަދާ ކުރި މަސްއޫލިއްޔަތުތައް އަދީބު އަންގާ ގޮތަށް އަދާކުރުމުގެ މުގާބިލުގައި 650،000 ރުފިޔާ ދިނުމަށް އަދީބު ގާތު އެދިފައިވާ ކަމަށާއި އަދި އެ ފައިސާ ދިނުމުން އެ ފައިސާ ހިފާފައިވާ ކަމަށްވެސް ބުނެފައިވެއެވެ.